1664431934

ევროპის პროკურორის ოფისთან ურთიერთთანამშრომლობის შეთანხმების ფარგლებში, დაგეგმილია ევროკავშირის პროკურატურაში საქართველოს პროკურატურის წარმომადგენლის დანიშვნა, რომელიც ლუქსემბურგში, ევროკავშირის სათაო ოფისში იქნება მივლენილი - ამის შესახებ საქართველოს გენერალურმა პროკურორმა ირაკლი შოთაძემ, ევროკავშირის პტოკურატურის მთავარ პროკურორთან ლაურა კოვეშთან ორმხრივი შეხვედრის დასრულების შემდეგ განაცხადა.პროკურატურის ინფორმაციით, საქართველოს გენერალურ პროკურატურაში, საქართველოს პროკურატურასა და ევროპის პროკურორის ოფისს შორის შემდგომი თანამშრომლობის გაღრმავების მიზნით, ურთიერთთანამშრომლობის შეთანხმება გაფორმდა,რომელსაც ხელი მოაწერეს საქართველოს გენერალურმა პროკურორმა ირაკლი შოთაძემ და ევროპის (EPPO) მთავარმა პროკურორმა ლაურა კოვეშმა.გენერალური პროკურორის ირაკლი შოთაძის განცხადებით, საქართველოს პროკურატურაში ევროკავშირის პროკურატურის დელეგაციის ვიზიტი ევროპის (EPPO) მთავარი პროკურორის ლაურა კოვეშის ხელმძღვანელობით უაღრესად მნიშვნელოვანია და ორ უწყებას შორის თანამშრომლობის გაღრმავებას შეუწყობს ხელს.როგორც ირაკლი შოთაძემ აღნიშნა, ევროკავშირის პროკურატურასთან ერთად გაგრძელდება ეფექტიანი მუშაობა ტრანსნაციონალური ორგანიზებული დანაშაულის წინააღმდეგ, როგორიც არის კორუფცია, ფულის გათეთრება და სხვა ფინანსური დანაშაულები, რომელიც დაკავშირებულია ევროკავშირის ფონდების არაკანონიერ გამოყენებასთან.„რა თქმა უნდა, ევროკავშირის პროკურატურასთან თანამშრომლობა საქართველოს გენერალური პროკურატურისთვის პრიორიტეტული მიმართულებაა. აღნიშნული თანამშრომლობა დაიწყო დღეიდან, რაც საქართველოს ევროინტეგრაციის გზაზე გადადგმული მეტად მნიშვნელოვანი ნაბიჯი იქნება", - განაცხადა საქართველოს გენერალურმა პროკურორმა.

1664372760

"ნიკოლოზს უნდოდა განქორწინება, მაგრამ უნდოდა, რომ მისი ფიქტიური ცოლი ვყოფილიყავი, რასაც არავინ დათანხმდება"– განაცხადა ჩოგბურთელ ნიკოლოზ ბასილაშვილის ყოფილმა მეუღლემ, ნელი დოროყაშვილმა.როგორც მან დღევანდელ პროცესზე აღნიშნა, ურთიერთობის დაძაბვის შემდეგ, ის და ნიკოლოზ ბასილაშვილი ძალიან ხშირად საუბრობდნენ განქორწინებაზე."ნიკოლოზს სურდა განქორწინება, ოღონდ ეს ყველაფერი სასამართლოს გარეშე სურდა. ნიკოლოზს უნდოდა განქორწინება, მაგრამ უნდოდა, რომ მისი ფიქტიური ცოლი ვყოფილიყავი, რასაც არავინ დათანხმდება. გააგრძელებდით თქვენ ასეთ თანაცხოვრებას? ხელი გააწერო და ფიქტიური ცოლი იყო? ცოტა ცუდად ჟღერს, ქმართან ხელი გააწერო და ისე იცხოვრო",- განაცხადა დოროყაშვილმა.კითხვაზე, თუ გააუქმა ნიკოლოზ ბასილაშვილმა მას გენერალური მინდობილობა, როდესაც განქორწინდნენ და ჰქონდა თუ არა მის საბანკო ანგარიშებზე წვდომა, დოროყაშვილმა უპასუხა, რომ არ გაუუქმებია.მან დღევანდელ პროცესზე ასევე ისაუბრა იმაზე, რომ თურქეთში სამოდელო კონტრაქტი ნიკოლოზ ბასილაშვილის მხრიდან განხორციელებული წნეხისა და ფსიქოლოგიური ზეწოლის გამო გაწყვიტა და ხელშეკრულებით დარღვევისთვის თანხა თავად აანაზღაურა.დამატებით კითხვაზე, უთხრა თუ არა მან ნიკოლოზ ბასილაშვილს შემდეგი სიტყვები, "ელოდე ბოროტი ნეკას ბოროტ საქციელს", დოროყაშვილმა არ უარყო."მითქვამს, ამით მივანიშნებდი იმას, რომ სასამართლოს მივმართავდი და ყველაფერს ვიტყოდი, რასაც მიკეთებდა, არასდროს სერიოზულად არ აღიქვამდა იმას, რომ ამას მართლა გავაკეთებდი",-განაცხადა დოროყაშვილმა.მისი თქმით, ბასილაშვილის მხრიდან განხორციელებულ ძალადობას შვილის გარდა, არავინ შესწრებია. მისი თქმით, ძალადობის შემთხვევები ძირითადად სახლში ან სასტუმროში ხდებოდა.

1664369894

პროკურატურა ყოფილი მეუღლის მკვლელობის მცდელობაში ბრალდებულის საქმის წარმოების შეწყვეტისა და იძულებითი ფსიქიატრიული მკურნალობის განსაზღვრის შესახებ ოფიციალურ ინფორმაციას ავრცელებს.უწყების ცნობით, თბილისის საქალაქო სასამართლომ მეუღლის მიმართ დამამძიმებელ გარემოებებში ჩადენილი მკვლელობის მცდელობის, შემაკავებელი ორდერის დარღვევისა და ოჯახური ძალადობის ხუთი ეპიზოდის ჩადენისთვის ბრალდებულის მიმართ შეურაცხადობის გამო სისხლისსამართლებრივი დევნა შეწყვიტა და ფსიქიატრიულ დაწესებულებაში იძულებითი მკურნალობა განუსაზღვრა. ამის შესახებ ინფორმაციას საქართველოს პროკურატურა ავრცელებს."შინაგან საქმეთა სამინისტროს მიერ ჩატარებული გამოძიებით დადგინდა, რომ ბრალდებულმა, ფიზიკურად და ფსიქოლოგიურად რამდენჯერმე იძალადა მეუღლეზე. ასევე, მან დაარღვია მეუღლის მიმართ განხორციელებული ძალადობის გამო, მის მიმართ გამოცემული შემაკავებელი ორდერი, და 23 მაისს, გენდერის ნიშნით შეუწყნარებლობის მოტივით, განსაკუთრებული სისასტიკით, არასრულწლოვანი შვილის თანდასწრებით, დაზარალებულს დანით მრავლობითი დაზიანებები მიაყენა. დროულად აღმოჩენილი სამედიცინო დახმარების შედეგად დაზარალებულის გადარჩენა მოხერხდა.„სამართალდამცველებმა ბრალდებული იმავე დღეს დააკავეს. მას ბრალდება საქართველოს სისხლის სამართლის კოდექსის 11 პრიმა 19-109-ე მუხლის მე-2 ნაწილის ,,დ პრიმა“, ,,ვ’’ და მე-3 ნაწილის „ბ“ ქვეპუნქტებით (განზრახ მკვლელობის მცდელობა, ჩადენილი გენდერის ნიშნით, ოჯახის წევრის მიმართ განსაკუთრებული სისასტიკით) და 11 პრიმა 381 პრიმა მუხლის 1-ლი ნაწილით (შემაკავებელი ორდერით გათვალისწინებული მოთხოვნებისა და ვალდებულებების შეუსრულებლობა) და 126 პრიმა მუხლის მე-2 ნაწილის „ა“ და „ბ“ ქვეპუნქტებით , 126 პრიმა მუხლის მე-2 ნაწილის „ა“ ქვეპუნქტით –(ოჯახური ძალადობის ხუთი ეპიზოდი) წარედგინა და აღკვეთის ღონისძიების სახით პატიმრობა შეეფარდა” - ნათქვამია საქართველოს პროკურატურის მიერ გავრცელებულ განცხადებაში.როგორც საგამოძიებო უწყებაში განმარტავენ, გამოძიების მიმდინარეობისას მისი შერაცხადობის დადგენის მიზნით, დაინიშნა სტაციონარული სასამართლო ფსიქიატრიული ექსპერტიზა. ექსპერტიზის დასკვნით დადგინდა, რომ ბრალდებული შეურაცხადია.თბილისის საქალაქო სასამართლოს გადაწყვეტილებით, ბრალდებული იძულებითი მკურნალობის მიზნით ოთხი წლით მოთავსებული იქნება ფსიქიატრიულ დაწესებულებაში.

1664367113

ნიკოლოზ ბასილაშვილის სასამართლო პროცესზე, სადაც დაზარალებული ნელი დოროყაშვილის დაკითხვა მიმდინარეობს, ხმაური იყო.მხარეებს შორის სიტყვიერი დაპირისპირება მას შემდეგ დაიწყო, როცა ნეკა დოროყაშვილი დაცვის მხარის კითხვებს პასუხობდა.ნელი დოროყაშვილმა ამერიკაში ყოფნის პერიოდში მომხდარ ძალადობის ფაქტებზე ისაუბრა. ადვოკატები მას უსვამდნენ შეკითხვებს ნიუ-იორკში განვითარებულ მოვლენებზე და რამდენჯერმე გამოთქვეს ეჭვი დაზარალებულის მიერ მიწოდებულ ინფორმაციასთან დაკავშირებით.სხდომაზე ხმაური გამოიწვია დაცვის მხარის შეკითხვამ, თუ რატომ ხვდებოდა მის მიერ დასახელებული ინციდენტის შემდეგ ქალი ყოფილ მეუღლეს.დაცვის მხარის ადვოკატებმა დაზარალებულს დაუსვეს კითხვა ნიკოლოზ ბასილაშვილთან შეხვედრისას ის კორტებზე შეიპარა, თუ აკრედიტაციით შევიდა. ამ კითხვას ნელი დოროყაშვილის მხრიდან გაღიზიანება და ადვოკატებთან სიტყვიერი დაპირისპირება მოჰყვა.  ნელი დოროყაშვილმა ადვოკატები დისკრედიტაციაში კიდევ ერთხელ დაადანაშაულა და განაცხადა, რომ ამის გამო ყველას პასუხი მოეთხოვება.დაპირისპირების გამო ნელი დოროყაშვილმა მოსამართლგან შენიშვნა მიიღო.

1664361660

საქალაქო სასამართლოს გადაწყვეტილებით, დიდუბეში ყოფილი მეუღლის დაჭრაში ბრალდებული ლევან ასლანიშვილის საქმის წარმოება შეწყდა.აღნიშნული გადაწყვეტილება მოსამართლემ სასამართლო ექსპერტიზის დასკვნის საფუძველზე მიიღო, რომლითაც დასტურდება ლევან ასლანიშვილის ფსიქიკურად შეურაცხადობა.მოსამართლე დავით შარაძის გადაწყვეტილებით, ბრალდებული მაქსიმალური ვადით ხონის ფსიქიატრიულ კლინიკაში გაივლის მკურნალობას.დაზარალებული მხარე აღნიშნულ გადაწყვეტილებას არ ეთანხმება.ცნობისთვის, 23 მაისს, ლევან ასლანიშვილმა, გენდერის ნიშნით შეუწყნარებლობის მოტივით, განსაკუთრებული სისასტიკით, არასრულწლოვანი შვილის თანდასწრებით, ყოფილ მეუღლეს - დანით მრავლობითი დაზიანებები მიაყენა.